Haurren minbizi kasuen %75 inguru sendatzen dira

Heriotzarekin ez dela lotu behar esan du Aurora Navajas Gurutzetako Ospitaleko Onkologia Pediatrikoko arduradunak
asier iturriagaetxebarria- BILBO
«Haurren minbizia sendatzen da». Aurora Navajas Barakaldoko (Bizkaia) Gurutzetako Ospitaleko Onkologia Pediatrikoaren arduradunaren hitzak dira. Hori erakusteko, hainbat datu eman zituen atzo, Bilbon minbizia duten haurren Arabako, Bizkaiko eta Gipuzkoako elkarteekin batera eskainitako agerraldian. Esaterako, batez beste minbizia duten haurren %75 sendatzen dira. «Eta zenbait minbizi motatan, %100eko sendatze maila ere badaukagu», gaineratu zuen.
Gizartean zabalduta dagoen uste bat amaitzeko ahalegina egin behar dela azpimarratu zuen Navajasek. «Haurren minbizia ez dugu lotu behar heriotzarekin. Haurrek izango duten gaitz kronikotzat hartu behar da minbizia». Zehaztu zuenez, ume batzuekin 5-10 urte ere pasatzen dira gaitzik ez dutela esaten dieten arte. Esan zuen denbora horretan guztian umeak ahalik eta bizitza normalena egitea izan behar dela borroka nagusia. «Gizartean barneratu behar dira, inolako arazorik barik. Hezkuntzan, lan munduan...».Minbizi mota bakoitzak bere tratamendua duela esan zuen Navajasek. Ikerketari esker, ume batek minbizia duela jakin eta 24-48 ordura sendagileak badaki behin minbizia kenduta berriro izateko arriskua zenbatekoa den. Arriskua txikia bada, tratamendu arina ematen zaio, baina arriskua handia bada, orduan umeak denbora gehiago egon behar du ospitalean, eta hortik sor daitezke gerora neska-mutikoak gizarteratzeko arazoak.
Horren arabera, Gurutzetako Ospitaleko Onkologia Pediatrikoko Unitatean batez beste 30 ume izaten dituzte egunez. «Gauetan etxera joaten dira. Umeek eta gurasoek ahalik eta bizimodu normalena egitea lortu nahi dugu». Era berean, 12 ume epe luzerako izaten dituzte Gurutzetako Ospitalean, gau eta egun. Navajasek zehaztu zuenez, urtean 55 haurren minbizi kasu inguru agertzen dira Araban, Bizkaian eta Gipuzkoan.
Erreferentzia unitate eske
Gurutzetako Ospitalea erreferentzia unitatea da haurren minbizien kasuan. Hain zuzen, erreferentzia unitateak falta direla salatu zuten minbizia duten haurren gurasoen elkarteek (Aspanovas, Aspanafoha eta Umeekin federazioak), guztiak ez baitituzte erreferentzia unitate espezializatuetan tratatzen. Horiek zaintzeaz, oinarrizko arreta zerbitzuak arduratzen dira.
Era berean, autonomia erkidego guztiekin koordinatuta haurren tumoreen Espainiako erregistroa sortzeko eskatu zuten gurasoen elkarteek. Navajas doktoreak esan zien erregistroa berez 1980. urtetik badagoela Valentzian (Herrialde Katalanak), eta horri esker ikerketan, tratamenduan eta haurren zein gurasoen bizitza kalitatean hobetu ahal izan dela.
Hego Euskal Herriko elkarteak
Hona hemen minbizia duten haurren gurasoen elkarteak Hego Euskal Herrian:
Aspanafoha (Araba): Telefonoa: 945 24 03 52
Posta elektronikoa: aspanafoha@:jet.es
Webgunea: http://www.cancerinfantil.org/aspanafoha/home.htm
Aspanovas (Bizkaia): Telefonoa: 94 479 09 63
Posta elektronikoa: aspanovas@:aspanovasbizkaia.org
Webgunea: www.aspanovasbizkaia.org
Aspanovas (Gipuzkoa): Telefonoa: 943 24 56 20
Posta elektronikoa: aspanovas@:inicia.es
Webgunea: www.aspanovasgipuzkoa.org
Adano (Nafarroa): Telefonoa: 948 17 21 78
Posta elektronikoa: adano@:correo.cop.es